Simu di sittembre 1989 : U Svegliu Calvese urganiseghja un cuncertu, à a dumanda di u gruppu A Filetta, inde a catedrale San Ghjuvan Battistu, inde a citadella di Calvi.

A Filetta rivene d’un viaghju di Sardegna, è i cantadori volenu rende a so invitazione à quelli di u paese d’Orosei, chì sò stati belli ricevuti . E voce corse s'alzanu, acerbe e tenere, passendu da a tradizione a più pura à e cumpusizione e più timide ch'elli provanu valentamente, sicuri di scrive cusì a tradizione di dumane. Eppo, si sentanu e voce sarde, putente è arghite cum'è una sciumara impetuosa chì face ciottà tutt'a tradizione prufana è sacra di l'isula surella. Sorpresa è gioia di u pubblicu, chì scoprenu incù i duii insemi, l'emuzione nascendu di sta spressione cullettiva, rudu è senza artifizi.

Les Rencontres de Chants Polyphoniques sò nati cusì : d’un primu scontru, vivu è calurosu, d’una sprissione vucale induve l'individuu esce cresciutu di a so piazza ch'ellu avia mentre u gruppu, un scambiu sonu à sonu, nota à nota, chì lascie trasparisce tutt'a verità d'un'anima.

30 anni dopu, A Filetta accoglie sempre i gruppi invitati, à l’iniziu di u Svegliu Calvese, ch'elli venanu da Georgia, di a Reunione, di u Tibettu, di Brittagna, o bella sicura, di Sardegna... E cumpusizione anu maturatu, si sò mantenutu, arricchiti di mille scontri. Ma u piaciè di scopre hè sempre quì, inde isse voce, vicina o luntana, u soffiu primurdiale di l'omu.

Parchì, cum'è dicia Henri Gougaud : « Plus beau qu’eux-mêmes est le chant des hommes. Rien ne dit plus bravement leur dénuement, leur foi, leur insoupçonnable grandeur. »