« À libru apertu »…Torna un festivale ! vi dite.
Innò ! Ch’ùn hè un festivale ! Hè a chjave d’una bibliuteca, quella ch’ognunu di noi
averà à core di custrisce.
Hè una manera di capisce cum’ellu si passa da p è a pa/ p è a, pa = pa-pa, à a
scuperta allegra, ch’ellu si parla di quellu chì strufineghja a so maschetta raspiosa
nant’à a nostra, in una bella scaccanata !
Hè u chjassu chì ci porta da Perrault à Jack London, chì cì punta da Desnos à
Anton’Francescu Filippini, chì cì face corre à daret’à Meaulnes u Grande cum’è à
daret’à Pesciu Anguilla, chì face sunà Murtoriu è smarisce U zitellu di rena, chì cì
face sperà indè a Prumessa di l’alba è sunnià à e Neve di u Kilimandjarò.
Hè a cascetta cù l’arnesi di a lettura, chì ti permette d’apre tutte e porte di a
letteratura, finchè u piacè di l’una è di l’altra sianu bulighjati da fa ne unu solu, finchè
l’ordine o u consigliu altosu : « Leghji ! » ùn servinu à nulla !